Видеоиграта „Death Stranding 2“ достапна за обожавателите

Видеоиграта „Death Stranding“ за мнозина гејмерски сладокусци беше игра на годината – визуелно импресивна, комплексна, емотивна, единствена, но и комично апсурдна. „Death Stranding 2: On the Beach“ е сѐ тоа и повеќе, пишува гејминг-аналитичарот Хрвоје Марјановиќ за хрватски „Индекс“ (Index).

„Всушност, ‘ДС-2’ е целосно луда и донекаде поапсурдна од претходната. Но, овојпат не се работи за онаа чудност што ќе нè остави запрепастени како што беше тоа во првата игра, туку за чудност што ја очекувате и ви недостасуваше последниве шест години. Што се однесува до приказната – продолжуваме 11 месеци по настаните од првиот дел, а овој пат Сем Портер Бриџис патува од Јужна Америка до Австралија во обид да ја прошири мрежата и да ги поврзе континентите. Не сакам премногу да ја расипам приказната, иако, да не лажеме, ‘ДС’ беше подобро доживеан од самиот почеток отколку прераскажан… И да не станувам преголем филлозоф ‘ДС-2’ е темелно подобра игра во секој поглед“, пишува гејмерот во својата рецензија.

Според познавачот, секој дел од видеоиграта е надграден, па така, „ДС-2“ е „изненадувачки различно“, но сепак подобро искуство.

„Уште во првите неколку минути Ви е јасно дека ова е една од технички најсовршените игри на денешницата. А, кога приказната ќе почне, сѐ тоа станува сè подобро и подобро… Особено во делот каде што го среќавате ликот Нил“, оценува Марјановиќ.

Создавач на хит-играта од 2019 година, како и на овогодишното продолжение, е  јапонскиот мултинационален техно-конломерат „Сони“.