Трамп ја поздрави одлуката на МОК за забрана на трансродови жени во женска конкуренција на ОИ

Американскиот претседател Доналд Трамп ја поздрави одлуката на Меѓународниот олимписки комитет (МОК) за забрана на настап на трансродови жени во женска категорија на идните Олимписки игри.

МОК во четвртокот соопшти дека одлуката е донесена со цел „заштита на фер-плејот, безбедноста и интегритетот во женската конкуренција“.

Сите спортисти кои сакаат да настапат на Игрите, почнувајќи од Олимпијадата во Лос Анџелес во 2028 година, ќе треба да поминат еднократен тест за SRY-ген за да стекнат право на учество во женска категорија. Ова правило е во согласност со извршната уредба што Трамп ја донесе во февруари 2025 година во врска со учеството на трансродови лица во женските спортови.

„Честитки до Меѓународниот олимписки комитет за одлуката да ги забрани мажите во женските спортови. Ова се случува благодарение на мојата силна извршна уредба, во одбрана на жените и девојчињата“, напиша Трамп на платформата „Трут Соушл“ (Truth Social).

Одлуката на МОК следува по ревизијата на правилата за род, започната по Олимписките игри во Париз во 2024 година, кога боксерките Иман Келиф од Алжир и Лин Ју-Тинг од Тајван освоија златни медали. Тоа се случи една година по нивната дисквалификација од светските првенства поради наводно непоминување на тестовите за подобност.

МОК тогаш соопшти дека Келиф и Лин можат да се натпреваруваат бидејќи се родени и се идентификуваат како жени.

МИА