Заврши уписот на кандидати за втор и трет циклус на студии на УКЛО

Универзитетот „Св.Климент Охридски“ (УКЛО)-Битола го заврши уписот на кандидати за втор и трет циклус на студии за академската 2015-2016 година.

Дополнителниот, четврти уписен рок беше распишан за втор циклус универзитетски и втор циклус специјалистички студии, како и за трет циклус или докторски студии на барање на кандидати кои ги исполнуваа конкурсните услови, информираат од УКЛО.

- Во новата академска година на втор циклус студии ќе студираат 143 студенти. Бројот на запишани кандидати е очекуван и овозможува квалитет во реализацијата на академскиот процес. Во четвртиот уписен рок беа огласени и 70 места за студирање на трет циклус студии и притоа се пријавија 13 кандидати, со што вкупниот број на докторанди во новата академска година изнесува 34 кои ќе студираат на веќе акредитираните насоки, а се очекува и дополнителна акредитација за насоката Иновативни технологии за храна и нутриционизам, која се изучува на Технолошко-техничкиот факултет во Велес, соопшти универзитетскиот Сектор за односи со јавност.

Студирањето на трет циклус на студии се движи од 3.500 до 5.400 евра, додека за студенти од странство се движи од 4.000 до 7.000 евра во зависност од изборот на високообразовната установа и насоката за докторски студии.