Во Велешко се врши вакцинација на говедата против „јазлеста кожа“

Во велешките села неколку ветеринарни екипи од Ветеринарната станица од Велес од вчера започна превентивна вакцинација на говедата против болеста „jазлеста кожа“.

 

Како што информира за МИА, Димче Димитриевски директор на Ветеринарната станица од Велес, за оваа цел од Агенцијата за храна и ветеринарство ја добиле првата половина од четириилјади дози од потребните осум илјади вакцини.

 

- Од Агенцијата за храна и ветеринарство до нас беше дистрибуирана првата пратка и ние веднаш по пристигнувањето уште вчера започнавме со превентивната вакцинација на говедата против болеста „јазлеста кожа“, со цел превентивно да се заштитат говедата во Велешко кои ги има околу седум илјади грла. Кога ќе ја потрошиме првата доза ќе ја добиеме и втората, информира Димитриевски.

 

Во Велешко вакцинацијата започна да се изведува во поголемите  села, кои се  со поголем број на грла на говеда како што се: Градско, Подлес, Уланци,Караслари,Водоврати,Владиловци,Извор и Иванковци.

 

Вакцинацијата потоа ќе продолжи и со селата со помал број говеда, информира Димитриевски.

 

Инаку, за превентивна вакцинација на говедата против болеста „јазлеста кожа“, Агенцијата за храна и ветеринарство набави 250 илјади вакцини, кои ги дистрибуира до сите ветеринарни станици,амбуланти и матични ветеринари на територијата на цела Македонија.