Во нападите во Лисичанск загинаа 28 лица

Бројот на жртвите од украинските напади во кои беше погодена пекара во Лисичанск се зголеми на 28, а меѓу нив е и едно дете, соопшти администрацијата на првиот човек на самопрогласената Луганска Народна Република (ЛНР), Леонид Пашечник.

Руското Министерство за вонредни состојби претходно соопшти дека нивните службеници извлекле тела на 20 лица од урнатините по нападот.

Министерството објави видео на кое се гледа како работниците од итната помош носат две лица облеани во крв на носилки од урнатините на зградата во темнината.

Претходно, одделот објави дека неговите вработени спасиле 10 лица и им ги предале на медицинските лица. Во моментов нема коментар од украинска страна за тоа што се случило.

Портпаролката на руското Министерство за надворешни работи Марија Захарова изјави дека во моментот на нападот во зградата имало „десетици цивили“ и дека во нападот било користено западно оружје.

Информативниот центар во Луганск, кој е под руска контрола, извести дека Украина пукала врз пекарницата користејќи го мобилниот артилериски ракетен систем Химарс, испорачан од САД.

Според руски оперативец од оперативните служби,просечната возраст на жртвите била меѓу 30 и 40 години.

 Лисичанск се наоѓа во регионот Луганск, веднаш до линијата на фронтот, а руските трупи ја презедоа контролата врз градот во летото 2022 година.