Уставен суд не поведе постапка за Изборниот законик

Уставниот суд на Република Македонија на денешната седница не поведе постапка по иницијативата за оценување на уставноста и законитоста на одредби од Изборниот законик. Иницијативата е поднесена од претседателот на Светскиот македонски конгрес, Тодор Петров.

Судот не изрази сомнеж за членот 4 од Изборниот законик кој се однесува на избор на пратеници од дијаспората, бидејќи смета дека тој е во согласност со Уставот.

Не беше поведена постапка и за членот 31 од Изборниот законик кој се однесува за работата на Државната изборна комисија во врска со донесување на одлуки кои допираат до интересите на немнозинските заедници. Оваа законска одредба предвидува за донесување на такви одлуки член од ДИК кој припаѓа на немнозинските заедници да може да побара таквата одлука да биде донесена со консензус и доколку не се донесе со консензус предлог-одлуката на ДИК нема да биде донесена.