Трамп се закани дека ќе го скрати финансирањето на јавните медиумски сервиси

Американскиот претседател Доналд Трамп синоќа изјави дека „многу би сакал“ да го прекине финансирањето на американскиот јавен радио сервис Ен-Пи-Ар (NPR) и јавната телевизија Пи-Би-Ес (PBS), кои ги обвинува дека се „многу пристрасни“.

-Ќе ми биде чест да ставам крај на тоа, им рече Трамп на новинарите во Белата куќа.

Американските јавни медиуми, со понизок рејтинг од нивните европски колеги, долго време се мета на клевети од конзервативците, кои ги обвинуваат дека се „премногу левичарски“.

-Сите тие пари се фрлаат… И тие имаат многу пристрасен став, рече републиканскиот претседател.

Во истото обраќање до медиумите, Трамп го нападна главниот уредник на магазинот „Атлантик“, Џефри Голдберг, кој во понеделникот откри недостатоци во воената безбедност.

Според веб-страницата на јавниот радиодифузен сервис Пи-Би-Ес, структурата што ги дистрибуира федералните субвенции има буџет од приближно 500 милиони долари годишно, што беше одобрено од Конгресот за време на гласањето за буџетот.

Таа структура, Корпорацијата за јавна радиодифузија, наведува дека дава „повеќе од 70 отсто“ од своите субвенции на бројни локални радио и телевизиски станици, кои пак ги откупуваат правата за реемитување програми произведени од националните структури, Ен-Пи-Ар и Пи-Би-Ес.

Националната структура на Ен-Пи-Ар од своја страна наведува дека добива „околу еден процент“ од директните федерални субвенции и живее главно од реклами и програми купени од локалните станици.

Ен-Пи-Ар проценува дека 41 милион Американци, од вкупно 340 милиони жители, ги слушаат неговите програми секоја недела. Пи-Би-Ес проценува дека 36 милиони луѓе гледаат локална телевизија на нејзината мрежа секој месец.

Администрацијата на Трамп неодамна одлучи да ја распушти владината агенција која ги надгледува радио станиците Глас на Америка (ВоА), Радио Слободна Азија и Радио Слободна Европа/Радио Либерти.