Трамп го отфрли тврдењето на Нетанјаху дека нема глад во Газа

Американскиот претседател Доналд Трамп денеска изјави дека не се согласува со изјавата на израелскиот премиер Бенјамин Нетанјаху дека нема глад во Газа, откако се состана со британскиот премиер Кир Стармер во Шкотска.

Трамп рече дека ситуацијата во Газа е „ужасна“ и додаде дека САД „мора да помогнат на хуманитарна основа“, објави Би-Би-Си. Тој рече дека ќе воспостави центри за храна во кои луѓето ќе можат да влезат и дека нема да има „граници“, додавајќи дека е „лудо“ што луѓето сега можат да ја видат храната зад оградата, но не можат да стигнат до неа.

На новинарско прашање дали се согласува со забелешките на Нетанјаху за гладот во Газа, Трамп одговори: „Не знам. Врз основа на телевизијата, би рекол не особено, бидејќи тие деца изгледаат многу гладни“, објави АП.

„Сакаме децата да се нахранат“, рече Трамп.

Стармер, кој стоеше до Трамп, рече дека мора да се постигне прекин на огнот во Газа, каде што „ситуацијата е очајна“.

Трамп потврди дека тој и Стармер ќе разговараат за хуманитарната ситуација во Газа.

Претседателот на САД рече дека „со Хамас е тешко да се справи“ и дека сега кога имаат помалку заложници, ќе биде потешко да се постигне договор, бидејќи Хамас ги користи заложниците како штитови, „и кога ќе ги предадат, повеќе немаат штит“.

Но, Трамп додаде дека тој и израелскиот премиер Бенјамин Нетанјаху прават „разни планови“.

Според него, во некои случаи тие знаат каде Хамас држи заложници, но дека постојат аргументи за и против различни пристапи за тоа како можат да ги извлечат.

Израел вчера објави дека ќе ги паузира воените операции во некои области на Газа по 10 часа на ден, со цел да се подобри испораката на помош. Но, и покрај овие мерки, израелските операции продолжија и на други места во Газа.

Хуманитарните агенции ги поздравија новите израелски мерки, но оценија дека се недоволни. Сликите на сериозно ослабнатите деца предизвикаа глобален бес. Поголемиот дел од населението во Газа сега зависи од помош, а набавката на храна станува сè поопасна.

МИА