Најмалку 16 лица загинаа во две одвоени сообраќајни несреќи во Турција

Најмалку 16 лица загинаа, а повеќе десетици се повредени во две одвоени сообраќајни несреќи кои денеска се случија во близина на Анталија, кога се преврте патнички автобус, и во провинцијата Бурдур, каде што директно се судрија два автомобила.

Во тешката сообраќајна несреќа во турската провинција Анталија, кога патнички автобус излета од патот и се преврте откако возачот не успеал да ја совлада кривината, загинаа најмалку девет лица со голем број повредени, соопштија локалните власти. Повредените се пренесени во околните болници, меѓу кои е и Градската болница во Анталија.

Министерот за правда на Турција, Јилмаз Тунч, соопшти дека по повод несреќата е покрената истрага и дека се именувани еден заменик главен обвинител и двајца јавни обвинители, пишува турскиот „Хуриет“.

Гувернерот на Анталија, Хулуси Шахин, изјави дека во моментот на несреќата временските услови биле лоши, со дожд и магла, но нагласи дека станува збор за делница на која не е дозволена голема брзина.

Во друга тешка сообраќајна несреќа, на патот Анталија-Испарта, во провинцијата Бурдур, седум лица загинаа, а пет се повредени во директен судар на два автомобила. Според наводите на гувернерот на Бурдур, повредените се згрижени во болници, додека патот по увидот е повторно отворен за сообраќај.

Турскиот министер за внатрешни работи Али Јерликаја изјави дека несреќите во Анталија и Бурдур утрово „длабоко ја потресоа нацијата“ и упати сочувство до семејствата на настраданите, со желби за брзо закрепнување на повредените.

Истрагите за двете несреќи се во тек.