„Спортот и семејните вредности“ по втор пат во СЦ „Борис Трајковски”

 

 

По втор пат СЦ „Борис Трајковски“ ќе биде домаќин на манифестацијата „Спортот и семејните вредности”, проект во Агенцијата за млади и спорт, во соработка со спортскиот центар и Сојузот на спортски федерации на Македонија.

 

На манифестацијата што ќе се одржи денеска напладне од 12 часот, на едно место ќе соберат познати спортисти, културни умeтници и граѓани со една и единствена цел да го промовира спортот преку семејните вредности, а низ ревијални спортски натпревари ќе имаат можност да се дружат, спортуваат и забавуваат со своите најблиски.

 

- Идејата на проектот е да овозможиме пред сè дружење и забава за целото семејство преку рекреативни и друштвени игри во кои сите ќе бидат „победници”, а ќе нема поразени. Очекуваме масовна посетеност во сабота, со што ќе овозможиме покрај забавата и дружењето, дечињата одблизу да ја почуствуваат атмосферата во Вип Арената СЦ Борис Трајковски во која се испишани најголемите спортски, репрезентативни и клубски успеси и со тоа да ги насочиме кон спорт и здрав начин на живот”, изјави Златко Перински, директор на „СЦ Борис Трајковски”.

 

На настанот предвидени се десет спортски и друштвени игри кои ќе бидат промовирани од нашите познати и врвни спортисти. За сите учесници предвидени се симболични спортски награди.

 

- Промоцијата и воздигнувањето на спортот, негувањето на семејните вредности и мотивирањето на граѓаните за што почесто спортување и спортско дружење со своите семејства е една од главните причини за реализација на овој проект. Убеден сум дека на ваков начин ќе придонесеме за подигнување на свеста за водење на спортски и здрав начин на живот од една страна, но и за одржување на семејните врски и вредности преку спортските активности, потенцираше директорот на Агенцијата за млади и спорт Марјан Спасески.