Сити со надмоќна игра против Реал обезбеди второ финале

Фудбалерите на Манчестер Сити  се пласираа во финалето на Лигата на шампионите со победата против Реал Мадрид на домашен терен со 4:0 (2:0) и за титулата ќе се борат со Интер, кој  беше подобар во натпреварот против Милан. .

 

Во репризата од минатогодишното полуфинале, кога славеше Мадрид, Сити вечерва во реваншот по ремито во Мадрид (1:1) доминираше во двете полувремиња, а поведе со голот на Бернардо Силва во 23. минута.

 

Најсериозната шанса за израмнување Реал ја имаше во 35. минута кога Тони Крос од дваесетина метри ја погоди гредата.

 

Само две минути подоцна Бернардо Силва го зголеми водството на Манчестер Сити на 2:0.

 

Манчестер беше подобар во преостанатиот дел од натпреварот, но голманот Куртоа ги спречи Британците да ја зголемат разликата.

 

Исходот од играта стана извесен во 76. минута кога по центаршутот на Кевин де Бруин, Едер Милитао си постигна автогол за 3:0, што беше недостижен за Реал и покрај неколкуте шанси во продолжението.

 

Точка на тешкиот пораз на Реал стави Алварез во 90. минута.

 

Финалето на Лигата на шампионите ќе се игра во Истанбул на 10 јуни.