Шмихаљ: 22 јануари е најтешкиот ден за електроенергетскиот систем на Украина од 2022 година

За Украина 22 јануари беше најтешкиот ден за електроенергетскиот систем од големиот прекин на струја во ноември 2022 година, изјави синоќа првиот потпретседател на владата и министер за енергетика на Украина, Денис Шмихаљ.

Шмихаљ во објава на Телеграм наведе дека земјата се соочува со исклучително тешка ситуација поради низа фактори, пред сè постојаните напади кои доведоа до оштетување на производствените капацитети, разорување на дистрибутивните мрежи и трансформаторите, како и континуираните удари ширум енергетската мрежа.

Според него, енергетските компании се принудени да продолжат со вонредни исклучувања, додека државната компанија „Укренерго“, заради зачувување на стабилноста на системот, воведе посебни распореди за итни рестрикции.

Шмихаљ истакна дека најтешка е ситуацијата во Киев, Киевската област и Дњепропетровската област. Тој предупреди дека, покрај нападите врз инфраструктурата, се води и информативна војна, со појава на бројни дезинформации и манипулации во јавниот простор, повикувајќи ги граѓаните да се потпираат исклучиво на официјални извори на информации.

МИА