Шахпаска: После 40 години Кавадарци добива целосно нов објект – детска градинка

Министерката за труд и социјална политика Јагода Шехпаска денеска изврши увид во изградбата на новата градинка во Кавадарци. Новата градинка во Кавадарци, рече, е од големо значење за заедницата, бидејќи ќе одговори на потребите на граѓаните за зголемување на капацитетот за згрижување на деца од предучилишна возраст, вклучувајќи ги децата со попреченост, децата од семејства во социјален ризик, како и децата од ромските семејства.

Новата градинка, чија изградба започна во 2020 година, ќе згрижи 142 дечиња кои ќе добијат квалитетна услуга. Градинката се гради согласно најсовремените стандарди и ќе овозможи квалитетен престој за децата, но и реализација на концептот – учење преку игра, со што значително се подигнува и квалитетот на воспитно образованиот процес во градинката за децата од предучилишна возраст.

Изградбата на градинката во Кавадарци е реализирана согласно највисоките стандарди за енергетска ефикасност, а градинката ќе користи и обновливи извори на енергија преку системот на сончеви колектори.

-После 40 години, Кавадарци добива целосно нов објект-детска градинка којашто е финансирана целосно од Министерството за труд и социјална политика, во склоп на проектот за подобрување на социјалните услуги, којшто пак е поддржан од Светска банка. Децата ќе бидат згрижени во 7 групи, а за овој проект се обезбедени средства во износ од 53.200.000 денари, истакна Јагода Шахпаска, министерка за труд и социјална политика.

Зголемен пристап до социјални услуги и нивно проширување со нова збогатена понуда е цел на социјалната реформа што ја спроведува Министерството за труд и социјална политика. Преку активностите од Компонентата 2 од Проектот се зголемува пристапот до социјалните услуги за ран детски развој со посебен акцент на децата во социјален ризик, децата со посебни потреби и децата од ромски семејства.