Разбиена болничка банда која крадела новороденчиња

Седмочлена болничка банда, која крадела новороденчиња во градот Пешавар, а потоа ги продавала на брачни двојки без деца, е разбиена, а сите нејзини членови се уапсени, соопшти полицијата во Пакистан.

Членовите на бандата ги заменувале штотуку родените бебиња за починати новороденчиња од болниците и од домовите за мајки, уверувајќи ги несреќните родители дека нивните бебиња починале по породувањето.

Новороденчињата потоа ги продавале за цена која се движела од 650 до 2.850 американски долари.

Некои мајки пријавувале кај полицијата дека се сомневаат во тврдењето на болничките работници дека бебето им починало набргу откако дознаваеле дека родиле здраво новороденче, но криминалот со бебиња во Пешавар дури сега е разбиен.

Полицијата соопшти дека во спроведената акција во овој пограничен пакистански град се уапсени пет жени и двајца мажи.

Меѓу уапсените има една медицинска сестра, двајца болничари и бизнис агент, кој ги подготвувал зделките и договорите за продавање и купување на бебињата.

Засега е познато дека бандата украла и продала девет новороденчиња.

Во претресот кај бандата било најдено и спасено едно бебе кое требало да биде продадено.