Проект за меѓукултурен дијалог во организација на здружението „Ан блок“

Здружението на граѓани за култура и уметност „Ан блок“ Скопје од утре и во наредните четири дена во Крушево ќе го реализира проектот „Меѓукултурниот дијалог - инструмент за мир” финансиски помогнат од Влада на Република Македонија.

Проектот е поддржан и ќе се реализира во соработка со неформална група на граѓани и владини и невладини институции, а се вклучува во иницијативата на УНЕСКО за градење култура на мирот.

Ќе се реализираат повеќе активности чија главна цел е почитување на културните разноликости кои се фактор за развој на општеството и демократијата.  

Проектот ќе опфати социоработилници, трибина за меѓукултурниот дијалог на која ќе бидат претставени и афирмирани културите на Македонија, Полска, Хрватска и Франција, со посебен акцент на обичаите и носиите, како и народна музика, песна и танц од поднебјата на овие земји. Ќе има и творечка работилница на која ќе се изработуваат уметнички дела и ракотворби, како и посета на културно-историските споменици и староградска куќа во Крушево.