Презентиран изменетиот ДУП за дел од индустриската зона во Гевгелија

Општина Гевгелија денеска јавно ја презентираше измената на деталниот урбанистички план за дел од индустриската зона кој зафаќа површина од 35.698 метри квадратни во просторот меѓу неколкуте новопланирани улици во тој дел од градот.

Од Одделението за урбанизам, каде што е изложен документот, истакнаа дека просторот на опфат е наменет за изградба на сервиси, објекти за дистрибуција и производство од областа на лесната и незагадувачка индустрија, како и за изградба на стоваришта во планскиот период до 2021 година.

Од денеска до 8 март ќе се спроведе и јавната анкета за овој урбанистички документ. Во овој период заинтересираните граѓани и правни лица од конкретното подрачје опфатено со планот можат да доставуваат писмени предлози, мислења и забелешки преку анкетни листови кои се подигаат и доставуваат во Одделението за урбанизам на општина Гевгелија, каде што е изложен и изменетиот плански документ.