Претседател на здружение на пензионери заработи кривична пријава

Кумановската полиција поднесе кривична пријава против претседателот на здружението на пензионери од Куманово и го сомничи дека ја злоупотребил службената положба и овластување, соопшти денеска СВР Куманово.

Според пријавата, претседателот на кумановските пензионери, секретарот и потпретседателот го оштетиле буџетот на здружението со илјада евра, преку донесена одлука, спротивна од статутот на здружението.

- СВР Куманово поднесе кривична пријава против Б.Ј.(69) од Куманово, поради постоење основи на сомнение за сторено кривично дело „злоупотреба на службена положба и овластување“ по член 353 од Кривичниот законик, наведува кумановската полиција.

Според полицијата, тој донел одлука спротивна од статутот на здружението и за себе, секретарот и потпретседателот на здружението, го оштетил здружението за 60.000 денари.

- Пријавениот, како претседател на Здружение на пензионери Куманово, на 20.-ти декември, лани донел одлука за усогласување на висината на надоместок на функционерите на здружението, со што постапил спротивно на Статутот на здружението и Одлуката на Собранието на здружението од 19.02.2016. На тој начин за себе, секретарот и потпретседателот на здружението во 2022 година исплатил сума во вкупен износ од 60.000 денари и за таа сума го оштетил буџетот на Здружение на пензионери Куманово, соопшти полицијата.