Пред македонските винари претставена инокс опрема за винарство, млечна индустрија ...

Пред македонските винари денеска во Кавадарци беше претставена инокс опрема на фирмата ПИМ од Хасково, Бугарија за производство на вино, млеко, сокови...

Претставникот на оваа фирма во Македонија, Ристе Михајлов, кажа дека се работи за компанија која во последните две три години е најголем пероизводител на ваква опрема во светот.

-Целта ни е да ја запознаеме македонската јавност со оваа опрема. Се работи за опрема за винарство, млеко, пиво и сокови, кечап, мајонез, чоколада, комплетното прехрамбено производство, рече Михајлов.

Нагласи дека очекуваат македонскиот пазар допрва да се развива и тоа со оваа опрема која од ден на ден се модернизира. 

Енологот со долгогодишно искуство Марија Велковска, истакна дека се работи за спој на традиционалното со модерното.

-Од грозје се прави вино, а во технологијата на добивање вино се врши ферментација .Тие сега ни нудат помодерни ферментатори за разлика од претходните .Порано се започнало да се ферментира во буриња, потоа се појавил иноксот со ферментатори кои биле попрости и сега се оди напред во технологијата. Посебно кај нашиот вранец се оди со оросување одозгора на самото комиње за добивање подобра боја и квалитет и со полнотија на самиот вранец. Се појавуваат млади надежни инжинери кои размислуваат заедно со енолозите како да дојдат до  поквалитетно вино, рече Велковска. 

Очекува ова ќе го подобри квалитетот на виното и дека се надева новите садови да ја забрзаат технологијата.