Почина Томче Филиповски, поранешен легендарен фудбалер на скопски Работнички

Поранешниот легендарен фудбалер на скопски Работнички и прв човек на југословенскиот фудбал на крајот од 80-те години од минатиот век, Томче Филиповски, почина на 84-годишна возраст,

Со неговото име се врзани бројни успеси на клубот од Дебар Маало за кој Филиповски настапуваше 18 години во кои одигра 633 натпревари и постигна 225 голови. Во сезоната 1971/72 беше најдобар стрелец во Втората југословенска лига.

И покрај бројните понуди за промена на клупската средина, меѓу кои и од Вардар, Филиповски остана верен на Работнички до крајот на својата играчка кариера.

По завршувањето на кариерата на фудбалските терени, Филиповски продолжи активно да придонесува за развојот на фудбалот, како истакнат спортски работник и функционер. Во периодот од 1987 до 1991 година беше претседател на Фудбалскиот сојуз на Југославија, во период исполнет со значајни успеси на југословенскиот фудбал.

Изразувајќи сочувство по повод смртта на Филиповски, ФФМ наведе дека со неговото заминување „македонскиот и скопскиот фудбал загубија голема легенда, човек кој целиот свој живот го посвети на фудбалот.“

Филиповски ќе биде погребан утре на Градските гробишта Бутел во Скопје.

МИА