Пауза во Собранието на почетокот на седницата за законот за јазици

Во Собранието на Република Македонија на почетокот на првото продолжение на 15. седница на која треба да се расправа за Предлог законот за употреба на јазиците, во прво читање, е објавена едночасовна пауза, на барање на координаторот на пратеничка група од ВМРО-ДПМНЕ Благица Ласоска. 

На почетокот на продолжението на седницата, Зоран Илиески, исто така координатор на пратеничка група од ВМРО-ДПМНЕ, процедурално изнесе став дека тие како најголема опозициска партија во Парламентот, упатиле отворено писмо до претседателот на Собранието Талат Џафери во кое, како што рече, го информира кои членови од собранискиот Деловник се прекршени за Предлог законот за употреба на јазиците.

Илиески го повтори ставот дека за предложениот закон матична треба да биде Комисијата за политички систем и односи меѓу заедниците, а не Комисијата за европски прашања. Не се исполнети условите законот да се носи со предзнак на европско знаме, рече Илиески кој побара и јавна расправа за законот.

По процедуралната реакција на Илиески, неговата сопартијка Ласоска побара пауза од еден час. Првично Џафери не го прифати барањето и побара собраниските служби да извадат список на пријавени за збор за законот. По инсистирањето на Ласоска, со цел, како што рече таа, да не се повторат напнатите ситуации од вчера, објави пауза.