Папата Лав Четиринаесетти официјално го презеде епископскиот престол во Рим

Папата Лав Четиринаесетти,  вчера ги заврши последните церемонијални чекори по неговото устоличување на римскиот епископски престол.

Првиот папа од САД формално го презеде управувањето со базиликата „Св. Јован Латерански“ (Сан Џовани ин Латерано), која е катедрален храм на Рим и седиште на епархијата, со вечерна литургија во присуство на римски свештеници и верници.

Потоа, со папамобилот, Лав ја посети базиликата „Санта Марија Маџоре“, каде што се помоли на гробот на својот претходник Франциск и пред иконата на Дева Марија.

Во обраќањето до верниците од Рим, папата рече дека сака да ги слуша, „за да учи, да разбере и да ги решава работите заедно“.

Една од многуте титули на Лав Четиринаесетти, кои ги доби со изборот за папа на 8 мај, е онаа на епископ на Рим. Поради многубројните обврски како духовен водач на 1,4 милијарди католици, папата го доверува тековното управување со римската епархија на викар.

Лав Четиринаесетти беше пречекан на скалите на градското собрание на Рим од градоначалникот Роберто Гуалтиери. Од своја страна, папата го цитираше св. Августин, велејќи: „Со вас сум христијанин, а за вас – епископ“. „Денеска можам да кажам дека за вас и со вас сум римјанин“, додаде Лав Четиринаесетти.