Панел-дискусија во Тетово во рамки на кампањата на МОН „Магијата е во знаењето“

По настаните во Скопје и Прилеп, денеска во амфитеатарот на ОСМУ „Никола Штејн“ во Тетово ќе се одржи третата панел-дискусија  во рамки на националната кампања „Магијата е во знаењето“ што ја спроведува Министерството за образование и наука.

Кампањата беше промовирана на Светскиот ден на наставниците - 5 Октомври и има цел да ја истакне суштинската улога на наставниците и значењето на нивната професија во општеството.

Панел-дискусијата денеска е на тема „Каква магија се крие зад една петка – минатото и сегашноста во дуел“, со фокус на тоа како се менувало значењето на оценувањето низ генерации, што значи денес вистински успех и како наставниците го препознаваат трудот и напредокот на учениците во современиот контекст.

На настанот е најавено учество на  министерката за образование и наука Весна Јаневска, Милка Тримчевска - директорка на Биро за развој на образованието, Даниела Апостоловска - одделенски наставник и помошник директор во ООУ „Братство – Миѓени“ од Тетово, Сихана Каба Касами - одделенски наставник и директор во тетовското ООУ „Кирил и Методиј“ и Салих Мислими - доктор по општа медицина и професор по стручни предмети во ОСМУ „Никола Штејн" – Тетово.

Настанот ќе може да се следи и во живо на Јутјуб - каналот на Министерството за образование и наука: https://youtube.com/channel/UCzOX1KEu6ZBm14DqFasVMjA?si=MWcOfrO5OjMDZd_O .

МИА