Општина Штип доби два милиони денари од продажба на парцели

Во буџетот на Општина Штип се инкасирани два милиони денари од последната продажба на градежно земјиште за изградба на индивидуални куќи и стопански објекти соопшти денеска портпаролот на Општина Штип, Драган Ристов.

- Од понудените 20 градежни парцели на јавната електронска аукција продадени се девет парцели, од кои седум се за индивидуални куќи во населба „Дузлак“ и уште две парцели за индустрија. Со продажбата на седумте парцели за индивидуално домување продадени се и сите парцели за куќи вкупно 53, што беа предвидени на локацијата меѓу населбите „Дузлак“ и „Баби“, рече Ристов.

Тој истакна дека веќе се работи на изготвување нова урбанистичка документација за нови локации за продажба на парцели за куќи, а кои ќе бидат наменети и за проектот на Владата „Купи куќа, купи стан“ за млади брачни парови.

Ова е последната продажба во 2016 година  која Општина Штип ја спроведе, бидејќи поради предвремените парламентарни избори не може да се врши продажба на градежно неизградено земјиште.