Од 1 јануари Србија ќе воведе национален данок на CO2

Компаниите во Србија што произведуваат цемент, железо, челик, алуминиум, вештачко ѓубриво, но и електрична енергија – компании што се класифицирани како „големи загадувачи“ поради природата на нивната работа – ќе мора да ѝ платат на државата данок на загадување од 1 јануари.

Наплатата на тој данок ќе важи и за компаниите што увезуваат овие „валкани“ суровини.

Нацрт-законите на Законот за данокот на емисиите на стакленички гасови и Законот за данокот на увоз на производи со интензивна содржина на јаглерод во моментов се во процес на јавна дискусија, која ќе трае до 21 октомври.

Првиот јавен состанок на оваа тема ќе биде организиран денеска во Стопанската комора на Србија.

Српскиот закон предвидува надомест од само четири евра по тон јаглерод, а со плаќањето на националниот данок, домашните компании треба да бидат ослободени од плаќање на скапиот европски данок, што исто така стапува на сила на 1 јануари 2026 година.

Министерството за финансии на Србија наведува дека целта на воведувањето на овој данок е да се охрабрат компаниите да инвестираат повеќе во обновливи извори на енергија, зелена градба и декарбонизација, за да биде воздухот почист, а ризиците по здравјето на луѓето минимални.

МИА