Новата изјава на Кешишев која негира дека Палчо ги сторил убиствата нема доказна вредност

Во изјава за медиумите пред почетокот на судењето, обвинителките Жаклина Крстевска Јосифовска и Ана Стојковиќ Димитровска потврдија дека има материјални докази кои го поврзуваат првообвинетиот Љупчо Палевски Палчо со убиствата на малолетната Вања Ѓорчевска и велешанецот Панче Жежовски

Тие исто така го коментираа тврдењето на обвинетиот Влатко Кешишев. Тој доставил нова изјава во која наведува дека Палчо не бил на местото на убиствата, туку спиел во партијата.

„Оваа изјава нема доказна вредност, а обвинетите ќе имаат можност да дадат своја одбрана во текот на судењето,“ изјави обвинителката Стојковиќ Димитровска.

Според обвинението, Кешишев ја водел полицијата до местото каде биле закопани жртвите и претходно изјавил дека Палчо е сторителот. Но, неговата нова верзија го негира тоа тврдење.

Судењето продолжува со испитување на сведоци предложени од обвинителството, а потоа ќе се разгледуваат материјалните докази кои треба да ја утврдат вината на обвинетите.