Нова серија земјотреси во морскиот дел меѓу Санторини и Аморгос

Релативно мирна ноќ, во споредба со изминатите денови, поминаа жителите на Санторини и околните острови со оглед на тоа што не беа регистрирани силни земјотреси, меѓутоа претпладнево за помалку од еден час имаше серија земјотреси со јачина од над четири степени, јави дописничката на МИА од Атина.

Во морскиот дел меѓу островите Санторини и Аморгос во периодот од 10.36 часот до 11.24 по локално време беа регистрирани седум потреси меѓу 4,1 и 4,9 степени.

Во текот на денешниот ден состанок ќе одржат надлежните комисии во Министерството за цивилна заштита и климатски кризи на Грција за да ги разгледаат актуелните мерки, а главниот дел се однесува на училиштата на Санторини и соседните острови Иос, Аморгос и Анафи кои минатата седмица беа затворени и ќе треба да се донесе одлука дали ќе се продолжи мерката или од понеделник ќе се отворат.

Поради зголемената сеизмичка активност од четвртокот на Санторини е прогласена вонредна состојба до 3 март годинава, а од општина објаснија дека станува збор за „чисто административна одлука со цел забрзување на потребните процедури за преземање итни и ефективни мерки“.

На островот вчера беше грчкиот премиер Кирјакос Мицотакис, кој порача дека „целиот државен механизам е мобилизиран“ и уште еднаш им препорача на граѓаните да бидат смирени, а се осврна и на туризмот со оглед на тоа што Санторини е популарна туристичка дестинација, посочи дека „имаат должност да ја заштитат, да ја зачуваат репутација и да бидат сигурни дека 2025 година исто така ќе биде одлична година за туризмот на Санторини“.

– Затоа, во нашата јавна комуникација, треба да балансираме меѓу потребата да бидеме присутни и да дејствуваме превентивно, без, сепак, истовремено да репродуцираме катастрофални сценарија, кои потенцијално може да исплашат некои посетители. Драго ми е што велите дека засега не постои никаква таква индикација и ќе се бориме да продолжиме по оваа линија, со добра надеж дека појавата ќе стивне и многу брзо ќе можеме да се вратиме во нашата нормалност, рече Мицотакис.

Интензивните земјотреси на Санторини започнаа во неделата, додека според процените во Грција, во изминатите денови островот го напуштиле над 10.000 лица, а пред сè станува збор за работници кои на Санторини се во пресрет на новата туристичка сезона, но и локално население.