Нигериската армија ослободи 180 затвореници

Нигериската армија ослободи 180 луѓе кои со месеци биле затворени под сомнение дека се поврзани со бунтовничката исламистичка група Боко харам.

Меѓу ослободените има и мајки со бебиња и деца.

Осомничените беа предадени во градот Мајдугуру на гувернерот на нигериската сојузна држава Борно, Кашим Шетима, кој ќе ги врати на семејствата. Началникот на армијата генерал-полковник Кенет Минима изјави дека истрагата покажала дека ослободените не извршиле криминално дело.

Некои од ослободените жени изјавиле дека се вдовици, а други тврделе дека се затворени поради нивните браќа, кои се осомничени дека се членови на Боко харам.

Владата на претседателот Мухамаду Бухари изјави дека го испитува извештајот на „Амнести интернешнл“ во кој се наведува дека нигериската армија е одговорна за смртта на околу 8.000 приведени, некои биле убиени, а други умреле од глад и задушување.