МОН: Честит Меѓународен ден на образованието

Министерство за образование и наука (МОН) преку пишано соопштение до медиумите го честита 24 Јануари, Меѓународниот ден на образованието, потсетувајќи дека образованието е основно човеково право и дека се стремат што повеќе деца и млади тоа да го остварат на најдобар можен начин.

Порачува дека образованието е еден од врвните приоритети на Владата.

-Без квалитетно образование не можеме како општество да се развиваме и како држава да јакнеме. Затоа ги зголемуваме средствата кои ги вложуваме во нови училишта и спортски сали, во опрема и технички помагала, во дигитализација и можности за искористување на современи технологии во наставата, се вели во соопштението од МОН.

Магијата навистина е во знаењето, се додава, посебно во време кога се зголемуваат глобалните предизвици. Најдобриот одговор е да се свртиме кон образованието и да укажеме дека секој може да придонесе тоа да биде поквалитетно, било како наставник, родител, општествено одговорна компанија или невладина организација.

-Со најголеми буџетски ресурси досега, Министерството за образование и наука е насочено кон развој на современи наставни програми, унапредување на инклузијата во основното и средното образование и воведување нови, поправични формули за финансирање на училиштата. Продолжувањето на времето поминато во училиште со целни активности, не само што ги подобрува образовните резултати туку влијае и на целокупниот развој на учениците. Наставниот кадар има сигурност, добива повисоки плати и има можности за професионален и кариерен развој како никогаш досега, се нагласува во соопштението.

МИА