Млин приклучен на трафостаница копал биткоини во Бутел, сметката 260.000 евра

Со наод на овластено вешто лице и по извршено пребарување во деловен објект, утврдена е тешка кражба на електрична енергија од трафостаница во Скопје, соопштија од „Електродистрибуција“.

Како што информираат од компанијата, тимот за откривање на неовластено користење на електрична енергија, поради сомневања за кражба, побарал асистенција од Министерството за внатрешни работи и вклучување на вешто лице. Пребарувањето било извршено во деловен објект на улицата „Бутелска“.

При контролата било констатирано противправно користење на електрична енергија преку неовластено приклучување на три нисконапонски кабли директно во трафостаница во сопственост на „Електродистрибуција“. Според наодите, електричната енергија била користена за напојување на системи со графички картички за копање криптовалути, сместени во деловен објект – поранешен млин.

Од „Електродистрибуција“ информираат дека е составен записник за неовластено користење, изготвен е наод и мислење од овластено вешто лице и поднесена е пријава до МВР за неовластено преземање на електрична енергија, согласно член 235-а од Кривичниот законик.

Дополнително, изготвена е фактура за надомест на штета во износ од околу 16 милиони денари или 260.000 евра.