Македонскиот фолклор триумфираше во Бразил: „Студио Фолклор“ прво кај публиката, трето кај жирито

Убави вести пристигнуваат од Бразил, каде што изминатите денови се одржуваше меѓународниот фолклорен фестивал во Нова Прата, кој важи за неофицијално светско првенство во фолклорни танци, а Македонија имаше свој претставник – „Студио Фолклор“.

Македонските фолклорни амбасадори постигнаа голем успех, освојувајќи две награди. Со повеќе од 45.000 гласови од целиот свет, „Студио Фолклор“ го освои првото место според гласовите на публиката.

За споредба, според информациите од македонскиот претставник, минатогодишниот победник во оваа категорија наградата ја освоил со околу 7.000 гласови.

Успехот беше заокружен и со признание од стручното жири. Македонија и „Студио Фолклор“ го освоија третото место во оценувањето на жирито на фестивалот.

Така, македонските играорци од Бразил се враќаат со две големи признанија – прво место од публиката и трето место од стручното жири, но и со бројни нови почитувачи на македонските ора, традиција и фолклор.