Ковачевски и Бектеши тврдат дека нема застој во снабдувањето со нафта од грчките пристаништа

Ние се снабдуваме со нафта и нафтени деривати преку грчките пристаништа и нема никаков застој во тоа снабдување. Најважно од се е дека во моментот С Македонија непречено се снабдува со нафта и нафтени деривати, одговорија премиерот Димитар Ковачевски и министерот за економија Крешник Бектеши, на прес-конференцијата на новинарско прашање дали Владата има одговор како се дозволи да снема нафта еден ден.

Шпекулациите на кои граѓаните беа изложени во текот на минатата недела, појасни Ковачевски, прво предизвикале да има зголемена потрошувачка на гориво на бензинските пумпи. Информира дека за пет пати била зголемена дневната побарувачка односно продажба на гориво на бензинските пумпи. Дел од помалите продавачи на гориво во текот на првиот ден од ширењето на таа шпекулација, како што рече Ковачевски, ги намалија количините што ги продаваа на своите бензински пумпи, со цел количините што ги имаат да ги зачуваат и да ги продадат по поголема цена, по покачувањето што беше евидентно согласно движењето на цената на нафтата и нафтените деривати на светските берзи.

– Имаше зголемена продажба односно купување од страна на странски државјани во С Македонија со оглед на тоа што нашето усогласување на цените дојде подоцна од соседните држави. Оттаму имаше исто така на бензинските пумпи зголемена побарувачка, што може да се види на пограничните места во државата, каде неколкукратно беше зголемена продажбата на нафтените деривати, рече премиерот и додаде дека откако Владата излезе во текот на денот кога тоа се случи тоа, веќе нема гужви на бензиските пумпи и снабдувањето со нафта и нафтените деривати се одвива нормално.

На прашањето дали и кога може да се очекува да се пушти во функција нафтоводот во земјава и дали со тоа би се намалила цената на нафтата, министерот за економија Бектеши одговори дека тоа не значи дека ќе плаќаме поевтина нафта имајќи предвид дека се прават пресметкие и начинот како ќе се утврди цената за користење на нафтоводот.

Тој информира дека заедно со вицепремиерот Фатмир Битиќи и министерот за финансии Фатмир Бесими веќе преговарале за тоа која е обврската согласно Преспанскиот договор и што произлегува за нашата држава. Во моментот кога ќе имаме соодветно решение што ќе биде во интерес и на потрошувачите и државата, потенцира Бектеши, тогаш ќе донесеме соодветната одлука за да дозволиме нафтоводот да се пушти во употреба.

– Во зависност од оперативните трошоци, во преговорите е вклучена методологија, начинот на пресметка на нафтоводот, што не значи дека во овој момент би ги намалило цените на нафтата и нафтени деривати. Затоа преговараме, со цел да имаме во иднина таков нефтовод кој во континуитет ќе влијае во намалување на цената. Во овој момент на дневна база на светските берзи се менуваат цените на нафата и нафетние деривати. Цените во делот на транспортот што ги признава моментално што ги признава РКЕ и од пристаништетот од Солун, не се менува, изјави министерот за економија Крешник Бектеши.