Капчан: По глобалните неуспеси, Трамп би можел да се сврти кон Србија и Косово

Чарлс Капчан од Советот за надворешни односи на САД вели дека последната изјава на американскиот претседател Доналд Трамп за Косово и Србија треба да се гледа во контекст на лидер кој се обидува да го врати вниманието на јавноста за својата улога како „исклучителен преговарач“.

Според него, ветувањата на Трамп за прекин на војната во Украина и конфликтите на Блискиот Исток не се реализирани во пракса, бидејќи војните продолжуваат со несмален интензитет, а клучните актери не покажуваат подготвеност за компромис.

„Со оглед на тоа што тој не постигнува резултати на Блискиот Исток и во дипломатијата со Украина и Русија, тој би можел да се сврти кон Косово и Србија и да се обиде да постигне одреден успех“, рече Капчан во интервју за РСЕ.

Капчан, поранешен директор за европски прашања во Советот за национална безбедност на САД, исто така верува дека премиерот на Косово во техничкиот мандат, Албин Курти, „можеби отишол предалеку со националистичката карта“.

Тој предлага попрагматичен пристап кој, вели тој, би му помогнал на Косово да ги унапреди своите интереси.

Трамп неодамна изјави дека за време на неговиот прв претседателски мандат „спречил војна меѓу Косово и Србија“ и ветил дека тоа „повторно ќе го среди“.