Избрани најдобрите маски на карневалот „Прочка“ во Прилеп

Стручното жири во состав Ели Милошеска Луческа, етнолог, Тони Чатлески, уметник и Мрјан Матракоски, советник за образование, за најдобра современа маска ја прогласи маската „Ангелмен-заштитник на прилепските перници“ од ОУ „Климент Охридски“, а најдобра традиционална е маската „Весели тутунари“ од Прилеп. Жирито ги награди и дел од учесниците од другите градови од Македоија и од странство.

 

 

- Годинашниов карневал донесе многу оригинални домашни, но и разноликост и умешност кај странските маски. Се потврди впечатокот дека прилепскиот карневал во основа е на традицијата и на богатото наследство, вели етнологот Милошеска Луческа.

 

На јубилејниот 15-ти крневал „Прочка“ учествуваа над 1.500 групни маски од Македонија и од земјите од целиот Балкан, како и гости од Италија.

 

Жирито ги прогласи и најдобрите маски од вчерашниот детски карневал. Најдобра маска во категоријата јуниори е маската „Велигденски јајца“ од ОУ „Гоце Делчев“, а најдобра во категоријата сениори е маската „Пехари“ од ОУ „Кочо Рацин“.

 

Вечерва во Домот на културата „Марко Цепенков“ е отворена ретроспективна изложба за карневалот, а од 19 часот во хотелот „Липа“ е заедничката забава за маскираните кога на најдобрите ќе им бидат доделени и наградите.