ОН и Русија работат на договор за хуманитарно примирје

Обединетите нации и Русија се обидуваат да договорат прекин на борбите, со што би се овозможила испорака на хуманитарна помош во сирискиот град Алепо, а ОН предупредува дека за околу два милиони цивили, кои се заробени во него, „времето изминува“.

Специјалниот претставник на ОН за Сирија, Стефан де Мистура изјави дека се истражуваат информациите за тоа дека на Алепо е фрлен гас за кој се верува дека е хлорин, јавува Танјуг.

- Има многу докази дека тоа навистина се случило, рече тој пред новинарите, напоменувајќи дека овој напад доколку биде дефинитивно потврден, ќе биде  еднаков со воено злосторство.

Русија вчера соопшти дека од денеска воведува тричасовен прекин на огнот на дневна основа во Алепо за да може хуманитарниот конвој безбедно да влезе во градот, но посредникот на ОН вели дека тоа не е доволно.

Советникот на ОН  за хуманитарни прашања Јан Егеланд изјави дека за безбедна испорака на помош се потребни 48 часови пауза.

- Тоа што денес е ново и позитивно е дека Руската Федерација соопшти дека би сакала да седне со нас и другиот коопретседавач (САД), за да разговараат како предлогот на ОН да биде спроведен, рече тој.