Хезболах: Кој ќе помисли на војна со нас, ќе зажали

Ако непријателот започне војна против Либан, нашата борба ќе биде без граници, ограничувања, правила и контроли.

Кој ќе помисли на војна со нас ќе зажали затоа што војната со нас е многу, многу скапа, изјави генералниот секретар на Хезболах, Хасан Насрала.

Тој вчера оцени дека израелското убиство на заменик-лидерот на Хамас во Бејрут е „големо, опасно злосторство за кое тие не можат да молчат“.

Нападот на јужен Бејрут во вторникот вечерта, во кој беше убиен Салех ал-Арури, заменик-шефот на политичкиот комитет на Хамас, Насрала го опиша како „очигледна израелска агресија“.

Тој му изрази сочувство на Хамас и порача дека ова убиство нема да остане неказнето.

Насрала се закани дека нема да има „ограничувања“ или „правила“ во нивната борба доколку Израел започне војна против Либан.

-Ако непријателот (Израел) мисли да води војна против Либан, ние нема да следиме никакви правила, рече Насрала во говорот одржан преку видео врска за време на митингот по повод четвртата годишнина од убиството на моќниот ирански генерал Касем Сулејмани од страна на Американски дрон во Ирак во 2020 година, пренесува ДПА.

Нападот на јужното предградие Дахиех во Бејрут е прв израелски напад врз Бејрут по речиси тримесечни речиси секојдневни престрелки меѓу израелските сили и Хезболах во пограничната област.

Израел го смета Ал-Арури за главен организатор на нападите на Западниот Брег. Израелската армија не сакаше да го коментира неговото убиство.

Насрала рече дека „брзата“ реакција на Хезболах на 8 октомври и прекуграничното гранатирање оттогаш спречиле пошироко израелско бомбардирање на Либан и покажале дека способноста на Израел да спречи такви напади „пропаднала“.

Во израелските напади загинаа повеќе од 120 борци на Хезболах и повеќе од 20 цивили. Во судирите загинаа најмалку девет израелски војници. Тоа беше трет говор на Насрала од 7 октомври.

Насрала најави дека на 5 јануари повторно ќе и се обрати на јавноста со повеќе детали за акциите на Хезболах на југот.