Градоначалникот Јакимовски го посети ООУ „Вера Циривири- Трена“

Градоначалникот на општина Карпош Стевчо Јакимовски денеска го посети ООУ „Вера Циривири- Трена“. Ова е шесто училиште од вкупно десет, кое од 15 октомври 2015 година користи сопствено греење.

- Станува збор за употреба на геотермални пумпи и користење обновливи извори на енергија, со што даваме придонес во подобрување на еколошката состојба во општина Карпош. Ги исполнуваме условите на протоколот 20/20/20. Тоа значи, 20 отсто намалување емисија на штетните гасови во атмосферата, 20 отсто користење обновливи извори на енергија и 20 отсто заштеда на енергија , рече Јакимовски.

Тој информира дека инвестицијата во грејниот систем во ООУ „Вера Циривири-Трена“ ја чини општина Карпош 4.500.000 денари. Училишниот објект, како што рече, годишно ќе се грее за седум до осум илјади евра.

Јакимовски истакна дека со реконструкција и поставување термо-фасади и монтирање нови прозорци во сите училишта, веќе е регистрирана намалена потрошувачка на енергија за 60 отсто. Најави дека наскоро ќе го применат системот на загревање во ООУ „Димо Хаџи Димов“, со т.н печка со „дрвен чипс“.