Германските власти испитуваат дали крајната левица е поврзана со експлозиите во Дортмунд

Неколку германски медиуми јавија дека во белешката, што беше пронајдена по вчерашниот напад врз автобусот на фудбалскиот клуб „Борусија Дортмунд“ е користена радикална исламистичка реторика.

Германската полиција, сепак, не е сигурна дали таа е автентична или е обид за измама на властите. 

Германските иследници го проверуваат и второто писмо, што беше објавено на антифашистички онлајн портал, според кое нападот е одмазда за мекиот пристап на тимот кон неонацистичките и расистичките фанови. 

На социјалните мрежи синоќа беа објавени неколку текстови, напишани во стилот на германската крајна левица, јави ДПА, посочувајќи дека во нив се наведува оти раководството на клубот не сторило доволно за да се спротивстави на расизмот, нацизмот и екстремнодесничарскиот популизам.

Претходно весникот „Велт“ објави дека до местото на вчерашната експлозија е најдена белешка, со што е преземена одговорноста за нападот. Во текстот бил наведен терористичкиот напад на божиќниот базар во Берлин и учеството на германските воени авиони во конфликтот во Сирија.