Најмалку шест жртви во ноќешните руски напади врз Украина

Најмалку шест лица загинаа во воздушните напади врз Украина во текот на ноќта, соопштија локалните власти, додека руските сили продолжуваат со нападите врз неколку украински области.

Тројца загинати има во главниот град Киев, каде што е пријавен прекин на снабдувањето со електрична енергија во неколку населби, информираа градоначалникот Виталиј Кличко и електроенергетската компанија.

Две лица загинале во централната Днепропетровска област, а еден жител е убиен во Запорошката област, во југоисточниот дел на земјата, соопштија тамошните регионални воени администрации.

Во меѓувреме, руското Министерство за одбрана соопшти дека неговите сили извршиле напад од големи размери и погодиле објекти од телекомуникациската и енергетската инфраструктура на Украина.

„Ноќеска вооружените сили на Руската Федерација извршија обемен напад со високопрецизно оружје и јуришни беспилотни летала со голем дострел. Во нападот беа погодени објекти од комуникациската и енергетската инфраструктура во Киев, како и во Киевската и Харковската област, што се користат за потребите на военоиндустрискиот комплекс и вооружените сили на Украина“, се наведува во соопштението на руското Министерство за одбрана.

МИА