„Евровизија“ се шири во Азија – првиот натпревар закажан за ноември во Бангкок

Организаторите на музичкиот натпревар „Евровизија“ објавија дека првото азиско издание на меѓународниот музички натпревар ќе се одржи на 14 ноември во главниот град на Тајланд, Бангкок.

Правилата за новиот натпревар сè уште не се објавени. На европскиот натпревар, националните радиодифузери избираат изведувачи кои ќе настапат со оригинална песна долга до три минути на сцената. Инаку, првите 10 земји учеснички на азиското издание се Јужна Кореја, Бангладеш, Бутан, Камбоџа, Лаос, Малезија, Непал, Филипините, Виетнам и домаќинот Тајланд. Организаторите велат дека и други земји би можеле да се приклучат на натпреварот во наредните месеци, пренесува „Ен-би-си“ (NBC).

Директорот на „Евровизија“, Мартин Грин рече дека лансирањето на азиското издание е особено значајно во годината што ја одбележува 70-годишнината од натпреварот.

– Азија е подрачје богато со култура, креативност и музички талент, додаде тој.

Замислата за азиска верзија на „Евросонг“ постои уште од 2008 година, иако сè уште не е спроведена. Регионалните сили Кина и Јапонија засега не учествуваат во азиското издание. Аналитичарите, сепак, велат дека новиот натпревар би можел да биде под влијание и на геополитиката, со оглед на споровите, на пр., меѓу Тајланд и Камбоџа или територијалните претензии во Јужното Кинеско Море.

И Русија лани го заживеа својот меѓународен натпревар сличен, но независен од евровизискиот. „Интервизија 2025“ се одржа на 20 септември во Москва. Следното издание е закажано да се одржи во Ријад, Саудиска Арабија, во ептември, оваа 2026 година. 

Организаторите проценуваат дека новиот азиски натпревар би можел да привлече публика од повеќе од 600 милиони луѓе, значително повеќе од приближно 166 милиони гледачи кои го гледаа последното европско издание.

МИА