ЕУ вети над една милијарда евра помош за Сирија меѓу 2018. и 2019.

Европската унија вети дека ќе отпушти хуманитарна помош за Сирија во износ од 560 милиони евра за 2018 година и иста толкава сума за 2019 година, изјави денеска високата претставничка на Унијата за надворешна политика и безбедност, Федерика Могерини, која ја отвори во Брисел меѓународната донаторска конференција за Сирија.

- ЕУ целосно ги исполни ветувањата за 2016 година, го задржа нивото на поддршка за 2017 година. Ги испочитувавме заложбите за ниво од 560 милиони евра во 2018 година и уште толку во 2019 година, рече Могерини.

Храната и лековите, како и други неопходни работи, кои ќе бидат купени со тие средства ќе бидат распределни преку меѓународните невладини организации и агенциите на ОН.

Хуманитарните напори треба да бидат спроведени со реален напредок на преговорите во Астана за стопирање на огнот во Сирија и на средбите во Женева, каде се бара политичко решение за сирискиот конфликт, нагласи Могерини.