Џафери: Првиот сигнал за техничка влада Собранието треба да го добие на 30 декември

Првите сигнали дека ќе има техничка влада и стои договореното за предвремни избори на 12 април, парламентот ги очекува на 30 и 31 декември, вели претседателот на Собранието Талат Џафери на брифинг со новинарите. Засега, вели Џафери, нема информации дека ќе има некакво одложување. Седницата за избор на техничка влада останува на 3 јануари, а распуштањето на 12 февруари.

Собранискиот спикер потврди дека измените на изборниот законик на помалите партии за 1 изборна единица се веќе доставени до пратениците и предлогот ќе биде ставен на седница, но не прецизира кога тоа би било направено.

- Не навлегувам во гласањето, но лично мислам дека за изборен законик потребно е да има општ конзенсус. Мислам дека во таков покрет за измена на изборен модел не се влегува на еден месец пред истекот на мандатот на оној состав. Не е само гласањето туку е сложена операција - рече Џафери.

Тој го потврди и својот став дека не треба да се свикува седница по распуштањето на парламентот доколку протоколот за членство на НАТО стигне по распуштањето на Собранието. Сепак, вели дека најновите информации од Шпанија се дека протоколот би бил ратификуван од нивниот парламент во јануари, па Македонија тоа ќе може да го направи пред 12 февруари. 

Катерина Нешкова