Џафери: Ниту законот за обвинителство е услов за ЕУ ниту законот за одбрана за НАТО

Доколку партиите се усогласат околу текстот на законот за обвинителство и тој биде пуштен во собраниска процедура, веднаш ќе биде ставен на седница и за неколку часа да биде донесен, вели собранискиот спикер Талат Џафери. 

На брифинг со новинарите тој посочи дека нема зошто да свикува седница ако нема усогласени ставови и позитивен исход за законот. При тоа Џафери не појаснува што точно мисли кога вели усогласеност - обезбедена бројка од 80 пратеници или пак усогласеност со ВМРО-ДПМНЕ. 

- Ова е многу битен закон но никој од ЕУ не дошол да каже дека е некаков услов. Пример не ни беше спомнат на средбата со Сасоли. Исто и законот за одбрана. Сами си создаваме обврски претставувајќи ги како услов, а реално законот за одбрана не е експлицитен предуслов за НАТО. Таков услов беше името и тоа го решивме. Да, добро е кога веќе сме членки да имаме ваков закон со кој ќе се овозможи брзо носење на одлуки во одбраната што е сосема друго - рече Џафери на брифингот.

Катерина Нешкова