Две момчиња од Скопје тврдат дека биле претепани од полицајци, МВР отвори истрага

Две момчиња од Скопје тврдат дека биле физички нападнати и малтретирани од полицајци. Во видео објавено од дел од медиумите, тие раскажуваат дека полициските службеници ги бркале поради сомнение дека украле пиштол, но тврдат дека тоа не е точно.

По објавените информации, од Министерството за внатрешни работи (МВР) информираа дека го истражуваат случајот.

-По објавите во дел од медиумите дека на 07.10.2026 година, на подрачјето на Скопје, две лица биле физички нападнати од полициски службеници при нивното постапување, при што, според нивните наводи, им бил оштетен и автомобилот, министерот за внатрешни работи наложи на Одделот за внатрешна контрола, криминалистички истраги и професионални стандарди да го испита случајот. Одделот презема мерки и активности за целосно утврдување на фактичката состојба и околностите на настанот, како и за утврдување на евентуална одговорност на инволвираните полициски службеници. По утврдувањето на фактичката состојба ќе бидат преземени соодветни мерки согласно законските прописи, а јавноста ќе биде навремено известена, стои во соопштението на МВР.