Дипломати: Подготвен е нацрт на заедничката декларација на лидерите на самитот на Г20

Нацрт-заедничката декларација на лидерите што ќе присуствуваат на самитот на Г20 во Јужна Африка овој викенд е финализирана, соопштија вечерва јужноафрикански дипломатски извори.

Нацрт-текстот е резултат на интензивни преговори што од неделата ги водат политичките претставници на земјите од Г20 претставени во Јоханесбург, во отсуство на САД, кои го бојкотираат состанокот.

Самитот на Г20, група составена од 19-те најголеми економии во светот, Европската Унија и Африканската Унија, традиционално завршува со заедничка декларација на лидерите во која се сумираат точките на консензус постигнати за економски прашања, борбата против климатските промени и глобалното управување.

Официјалната агенда на дводневниот самит во Јоханесбург се фокусира на одржливоста на долгот за земјите со ниски приходи, финансирање на „праведна енергетска транзиција“ и пофер експлоатација на критичните минерали, со кои е богат африканскиот континент.

Дипломатски извори потврдија дека навистина е подготвен нацрт-текст и дека ќе биде испратен до лидерите, неопходен чекор за усвојување на конечна заедничка декларација.

Сепак, вообичаениот наслов на документот, Декларацијата на лидерите на Г20, е променет, додадоа изворите, без да откријат како ќе биде насловена декларацијата.

Американските власти го информираа јужноафриканскиот претседател дека се противат на објавувањето на конечното соопштение на Г20, наведувајќи го нивното отсуство од самитот, чии „приоритети се во спротивност“ со политичките позиции на Вашингтон.

Лидери на Г20 денеска пристигнуваат во економската престолнина на Јужна Африка, вклучувајќи го индискиот премиер Нарендра Моди, бразилскиот претседател Лула да Силва, францускиот претседател Емануел Макрон и кинескиот премиер Ли Кечијанг.

Јужна Африка треба да го предаде ротирачкото претседателство со Г20 на САД в недела. На церемонијата ќе присуствува вршителот на должноста амбасадор на САД во Преторија.

Следниот самит на Г20 ќе се одржи во декември во Мајами, на голф терен во сопственост на семејството Трамп. 

МИА