Детска песна за „Голема Албанија“ емитувана на МРТ2, програмскиот совет ќе утврдува одговорност

Во рамки на детска фестивалска програма емитувана на 28 март на МРТ2 на албански јазик, беше прикажан настап на 13-годишно девојче кое изведе песна „Trojet shqiptare“ во која се пее за „Голема Албанија“. Содржината на песната и симболите (мапа на „Голема Албанија“) употребени за време на изведбата предизвикаа бурни реакции во јавноста.

Поради оваа причина програмскиот совет на МРТ закажа седница на која ќе се разгледува скандалот.

Според стиховите од песната, отворено се пееше за територијални претензии и кон Македонија, и кон Грција, кон Србија, кон Црна Гора… „Летај, летај, Албанијо, летај, знамето наше се издигнува над земјата“,  „ќе дојде ден кога сите ќе бидеме заедно, зашто сме еден народ, еден сон, една цел“… беа дел од стиховите со јасна порака за обединување на албанските територии.

Програмскиот совет треба да утврди како се случило ваква песна да помине низ програмскиот филтер на јавниот сервис, дали имало уредничка проверка и внатрешната контрола.