Дала 2.700 евра а барала да се вратат 15 илјади евра, уапсена 53 годишна лихварка во Струмица

На 26.02.2026 во Струмица, полициски службеници ја лишија од слобода Ј.Т.(53) од Струмица, поради сомнение за лихварство. Таа во јуни 2025 година на жител од струмичко село му дала 2.700 евра, а сега барала да ѝ врати несразмерен износ од 15.000 евра.

Ј.Т. била фатена при прием на 100 евра – месечна камата – при што биле пронајдени обележаната банкнота, тетратки и листови со евиденција за дадени пари и камати. Претресот во нејзиниот дом потврди дека во повеќе наврати давала пари за кои барала несразмерни камати.

Ј.Т. е задржана во Полициската станица Струмица, а јавен обвинител од Основното јавно обвинителство Струмица ќе поднесе кривична пријава за лихварство по член 260 од Кривичниот законик.