Дачиќ: Србија нема да го поддржи членството на Косово во ОН

Србија, секако, нема да поддржи членство на Косово во меѓународните организации што би значело легализација на еднострано прогласената независност на Косово, вклучувајќи и ги ОН, порача српскиот министер за надворешни работи Ивица Дачиќ.

Дачиќ порача и дека дијалогот меѓу Белград и Приштина е статусно неутрален, и реагирајќи на повикот на амбасадорот Мајкл Кирби, потсети дека САД и Србија имаат различно гледање на еднострано прогласената независност на Косово, што, како што вели, можело да се види и при разгледување на барањата за членство на Косово во УНЕСКО.

Амбасадорот Кирби, имено, рече во интервју за „Новости“ дека нормализацијата на односите Белград-Приштина „подразбира членство на Косово во ОН“.

- Не бараме Србија да ја признае независноста на Косово, туку нормализација на односите Белград-Приштина. Што ќе значи на крајот таа нормализација, на ЕУ останува да дефинира, но според нас тоа значи членство на Косово во ОН, рече Кирби.