Црна Гора го одбележува Денот на независноста

Црна Гора денеска го одбележува Денот на независноста и 19 години откако на референдум ја обнови својата државна самостојност, јави Мина.

На референдумот одржан на 21 мај 2006 година, гласаа 419.240 граѓани, или 86,5 отсто од вкупниот број гласачи.

Независноста на државата ја поддржаа 230.661, или 55,5 отсто од граѓаните на Црна Гора кои излегоа на референдумот, додека за останување во заедничка држава со Србија гласаа 185.002 или 44,5 отсто.

Собранието на Црна Гора претходно го усвои Законот за референдум, кој беше договорен со препорака од Европската унија. За успешен референдум беше потребно тој да биде поддржан од 55 отсто од излезените гласачи.

Референдумското прашање гласеше – Дали сакате Република Црна Гора да биде независна држава со полн меѓународно-правен субјективитет.

Собранието на Црна Гора на 2 март, на предлог на претседателот на Републиката Филип Вујановиќ, донесе одлука референдумот за државно-правниот статус да се одржи на 21 мај.

За претседател на Републичката референдумска комисија (РРК) беше избран Словакот Франтишек Липка.

Право на изјаснување на референдумот имаа граѓаните кои согласно прописите за избори имаа избирачко право.

Според податоците на РРК, право на глас на референдумот имале 484,7 илјади граѓани.