Би-Би-Си: Осум „сомнителни“ тенисери играат на Австралија Опен

Британскиот сервис BBC пренесува дека постојат докази, дека врвни светски тенисери местеле мечеви дури и на најголемиот од сите турнири, Вимблдон. BBC во текстот тврди дека поседува документи кои докажуваат дека мечеви биле местени и на најголемите светски турнири.

 

„Во последните 10 години за местење се обвинети 16 тенисери, кои на АТП листата биле меѓу најдобрите 50 во светот. Сите тие продолжија да играат тенис, а некои од нив станаа и Грен слем шампиони“, пишува BBC.

 

„Документите кои ги добивме покажуваат дека во Русија, северна Италија и Сицилија се уплатувале стотици илјади фунти на наместени мечеви, од кои три се одиграни на Вимблдон“.

 

Марк Филипс, еден од оние луѓе кои го истражувале местењето на мечеви во тенисот од 2007 година, потврдува дека следел одреден број на играчи.

 

„Имаше околу десет тенисери за кои верувавме дека најчесто местат мечеви. Доказите до кои дојдовме се навистина јаки“, рекол Филипс.

 

BBC, одлучил да не ги објавува имињата на тенисерите, бидејќи без пристап кон нивните банкарски сметки и компјутери, не е можно да се утврди дали тенисерите лично учествувале во местенките.

 

Британците ги поседуваат наодите од истрагата на Tennis Integrity Unit, а дури осуммина ‘сомнителни’ тенисери, во ноќта помеѓу неделата и понеделникот, го започнаа учеството на Австралија Опен.