Бајден: Вчудовиден сум од она што се разбуди во Иран

Американскиот претседател Џо Бајден ги повика иранските лидери да не преземаат насилни акции против демонстрантите во земјата кои со недели протестираат по смртта на 22-годишната Махса Амини во средината на септември. Махса Амини беше приведена од полицијата за морал на Техеран поради кршење на строгиот кодекс на облекување на жените во земјата.

Бајден во калифорнискиот град Ирвајн изјави дека е „вчудовиден“ од масовните протести во Иран и нагласи дека САД ги поддржуваат „храбрите жени“ на таа земја. – Иран мора да го запре насилството врз сопствените граѓани кои само ги користат своите основни права, рече Бајден.

– Бев вчудовиден од она што се разбуди во Иран. И се разбуди нешто што мислам дека нема да стивне долго, долго време, рече американскиот претседател.

Бајден истакна дека жените и мажите треба да имаат право на слобода на изразување и собирање. – Жените се прогонувани низ целиот свет на различни начини. Но, тие треба да можат да се облекуваат, за волја на Бога, што сакаат. Никој не треба да им кажува што да носат, додаде тој.

Од смртта на Махса Амини, протести против иранското раководство се одржуваат низ целата земја и во странство, особено против задолжителното носење шамии. Безбедносните сили одговорија со жестока акција, при што наводно загинале десетици, а многумина се повредени.